يا عم خليك creative..
هنا بيخطر على بالك تساؤلات كتير و تدخل في دوامة جلد الذات اللي ملهاش اي دخل بإبداعك خالص.أنت نِفسك تشتغل و تطلع بأفكار مبدعة وتبهر العالم بإبداعك و أفكارك ،لكنك سامع العالم بيقولك أنت غير مبدع بالمرّة.
تعالى معايا نثبت للعالم إنك موجود ( مبدع يعني).
الإبداع موهبة أم مهارة ؟
كتير مننا معتقد إن الإبداع موهبة موجودة عند بعض الناس، و لو مش موجودة عندك يبقى إستحالة تتوجد.هبة من عند ربنا لو رزقك بها تبقى أنت شخص محظوظ و لو مش فيك هتنضم لصفوف الناس العادية غير المبدعة و ربنا يعوض عليك.
هتعيش حياة عادية بدون طعم الإبداع اللذيذ اللي بيحسسك إنك مختلف بأفكارك المبدعة. فيُفضّل تدوّر على شغلانة عادية زيك ملهاش علاقة بالإبداع و المبدعين عشان ميطّلبش منك أفكار برا الصندوق و تلاقى نَفسك مش عارف تبدع ولّا تدخل في منافسة مع زميل مبدع تتأكد من حقيقتك المُرّة و تقول إن الدنيا حظوظ هو حظه إنه مبدع فأخذ الترقية إنما أنت عمرك ما هتطلع للنور لأنك إنسان غير مبدع ..
حلوة الدراما مش كدا ..!
الحقيقة أن الإبداع مهارة مش موهبة .يعني كل السيناريو اللي أنت عيشته دا ملوش اي أساس من الصحة. كلنا مبدعون لا استثني أحد.
الإبداع مهارة بنتعلّمها و بنطّورها كمان .و الإبداع هنا مش معناه الفن بأشكاله المتنوعة زي الرسم و الموسيقى و الأدب،مع العلم إن حتى دول ممكن تتعلّمهم عادي. لكن نقصد بالإبداع إنك تكون مبدع في حياتك المهنية بالأخص لأن أكل العيش مُر و عشان تكبر في مجالك لازم تكون مختلف و مميز عن كل اللي حواليك، لازم تكون مبدع!
و مين مننا مش نِفسه يجيب أفكار من الهوا، بمجرد ما يطّلب منه فكرة ينزل بمئات الأفكار يبهر بيها كل الموجودين.
كل واحد مننا جوّاه مبدع صغير محتاج اللي يغذيه و يطوره و كمان يشجعه و يحترم بشريّته ، مهو إحنا مش كومبيوتر ولا آله هتضغط على الزر تنزل بسيل من الأفكار المبدعة .
بس السؤال هنا إزاي هعمل كدا؟
خمس حاجات لو اشتغلت بيهم هتكون شخص مبدع.
عدّ معايا..
1.كُن ذو عقل متفتح.
خليك open minded! الجملة دي بتتفهم بشكل خادش للأدب و الأخلاق. بنرميها دايمًا على الأشخاص اللي مش شبهنا في التربية و المبادئ و كأنهم مجرمين هاربين من العدالة، لو دخل حد منهم جديد في الشلة بيكون في حالة من الإعراض عنه، و دايمًا بيكون في تخوّف منه كإنه عنده مرض مُعدي و لو اتفقت معاه في رأي يقولك شوف لعب في دماغك و بقيت شبهه.
تعالى نعد كام غلطة اتعملت في الموقف دا..
اولًا أنت حكمت على شخص بدون اي وجه حق حضرتك مش قاضي و الخروجة دي مش محكمة .
ثانيًا الاختلاف لا يعني إنكم أعداء و إنه داخل يغيّركم، على اي أساس افترضت سوء النية.
ثالثًا التربية و المبادئ ثوابت، اللي بيتغير عندنا هى طريقة التفكير،و احنا اتفقنا أن التطوير مطلوب و دا أول طريق الإبداع.
الغلطات الثلاثة دول هما اللي لو حليتهم هتكون صاحب عقل متفتح وتقدر تفكر بشكل مبدع.
فتّح مخك معايا كدا..
متصدرش أحكام لا على شخص ولا شئ (أنت مش قاضي)
تقبّل الإختلافات لإنك أنت كمان مختلف (مش شرط تحبها)
اسعى لتطوير شخصيتك بإستمرار (خليك مَرِن)
2.التفكير بإيجابية.
بنقول بص لنص الكوباية المليان،الغرض من الجملة دي إنك تغير إتجاه نظرك للكوباية فتشوف الجزء اللي يرضيك لأن ببساطة الرضا بيعلّمنا نشوف الحلو في كل وحش.طبعًا دا بالنسبة لناس كتير "اي كلام" مهو إزاي هشوف الحلو في كل وحش مهو وحش اصلًا.أنت كلامك منطقي، لكن الحقيقة أن الدنيا مش أبيض و أسود بس ،الدنيا ألوان كتير طلعت من الأبيض و الأسود، بمعنى إن جوّا الوحش في حلو و جوّا الحلو في وحش وأنت اللي بتقرر تلبس نضارة "الحلو" فتقدر تشوفه في أي موقف أو تلبس نضارة "الوحش" و برضو هتشوفه في كل موقف.
كل موقف بنمرّ بيه بيكون درس نتعلم منه في المستقبل و اكيد مش كل الدروس هتبقى لطيفة.زي المواد الدراسية اكيد يعني مكنتش بتحبها كلها .يعني أنت صاحب القرار ..
تحب تشوف إيه؟
الإبداع مليان حياة و من الصعب تكون مليان حياة و متشائم في نفس الوقت،و خليك فاكر التفاؤل بيجيب تفاؤل،يعني هتلاقى قعدتك مع ناس بتحب الحياة و مبدعة زيّك و دا نَفسه هيطوّر منك و من أفكارك و هيساعدك تبدع اكتر .
و أنت نفسك هتستفاد من التفكير بإيجابية لأنك هتكسب أعظم حاجة و هى الشعور بالامتنان و الشكر لما تكون مقدّر قيمة كل حاجة في حياتك و شايف قد إيه هى حلوة.
3.عدم الخوف من الفشل..
توماس أديسون الشهير مخترع المصباح الكهربى كان بيقول"أنا لم أفشل 10,000 مرة، أنا وجدت بنجاح 10,000 طريقة لن تعمل ." متخيل كم المرات اللي "فشل" فيها و مع ذلك استمر لغيّة ما وصل للإختراع اللي نور حياة البشرية كلها و على فكرة دا مكنش أول إختراع يجرب ينفذه، أديسون حاول ينفذ 7 اختراعات و لم يوفّق فيهم و مطلعوش للنور .
تفتكر لو أديسون خاف من الفشل أو تعب و يأس بعد تاني أو تالت محاولة حياتنا كانت هتبقى عاملة إزاي النهارده..ضلمة..
و كذلك حياتك كل مرة بتخاف تخوض التجربة "ضلمة". بتقول لو فشلت هيكون شكلي إيه ؟ الناس بتشوف النتيجة الأخيرة و بتنسى كل التجارب اللي قبلها و بعدين الفكرة المبدعة اللي أنت محتفّظ بيها عمرها ما هتنوّر من غير ما تجرب مرة و اتنين و تلاتة.
أنت عمرك ما هتعرف تبدع إلا إذا كان عندك تاريخ من التجارب، لأنك هتعرف منين الفكرة مبدعة ولا لأ من غير ما تجرّبها. و لو ألقيت نظرة على حياة المبدعين عبر التاريخ هتشوف إنها مليئة بمحاولات فاشلة (لن تعمل)،يعنى عشان تنجح و تبدع لازم تخوض التجربة.
4.فكّر بعقلية طفل!
الأطفال بطبعهم مبدعين،لإن الدنيا بالنسبة لهم حاجة جديدة يكتشفوها، فبيكون خيالهم واسع، و دايمًا بيسألوا كتير و اسئلتهم بالنسبة لنا بتكون وجوديّة، و عادتًا مخك بيهنّج قبل ما تلاقى رد على السؤال الموجّه لك، و احيانًا بتتصدم من السؤال و ميكونش عندك إجابة و تقول أنا عمرى ما فكرت في السؤال دا قبل كدا، و ممكن سؤال من طفل يخليك تسرح بخيالك أنت كمان. ما أنت جواك طفل مبدع لكن الأيام جت عليه شوية.
ليه العصافير بتطير؟
عشان عندها أجنحة.
يعنى الفرخه بتطير.
لا طبعًا يا حبيبي، جسمها تقيل.
و ليه عندها أجنحة؟
…
الطفل مش هيسألك سؤال واحد و خلاص، و مش هيسكت غير لو اقنعته بإجابة منطقيّة، و أسئلته دايمًا مفتوحة ،لأنه محتاج شرح و تفاصيل عشان يبدأ يكتسب معلومات. جرب تسأل طول الوقت أسئلة مفتوحة و دوّر على إجابتها ،هتجمع كمّ معلومات رهيب ودا هيخلّى مخك يبدع و يطلّع أفكار مبدعة أكتر لإنه بيفكر بطريقة الطفل المبدع اللي خياله ملوش حدود و بيستغل كل معلومة عنده في إيجاد أفكار مبدعة و مميزة.
5.الثقة الإبداعية.
كالعادة بننهى بالمهم. لإنك بعد ما تفتّح مخك و تفكّر بإيجابية و تخوض التجربة و تسأل زى الأطفال و تكون مبدع،هيجى عليك وقت و تتعب لإنك زى ما اتفقنا مش كومبيوتر، و على فكرة حتى الآلات بتعطل و بتحتاج صيانة .
شطارتك كمبدع إنك تكون واثق في إبداعك طول الوقت. يعنى إيه برضو ؟
الإبداع زي ما اتفقنا مهارة و اي مهارة لازم تنمّيها و تتمرن عليها باستمرار عشان تحافظ عليها ، لكن لكل جواد كبوة، و دا مش معناه أنك انتهت فترتك كمبدع.دى مجرد إستراحة محارب ،ولازم خلالها تفضل تتمرن حتى لو شايف أن الأفكار اللي بتطلع منك غير مبدعة.فترة ولازم هتمرّ بيها و هترجع تبدع أكتر من الأول.
و اخيرًا،خلّي معاك دايمًا ورق و قلم و اكتب فيهم أفكارك الملخبطه و ابدأ نظّمها في شكل خرائط و حاول تربط الأفكار ببعض هتطلع بأفكار مبدعة و هتمرن نفسك على تنظيم أفكارك.
و خليك واثق إنك مبدع.
0 تعليقات